డైలీ భారత్ రంగారెడ్డి జిల్లా: మధ్యప్రాచ్యంలో జరుగుతున్న యుద్ధంలో ఒక సంచలన పరిణామం చోటుచేసుకుంది. అమెరికా గర్వకారణంగా భావించే ఐదో తరం అత్యాధునిక ఎఫ్-35 లైట్నింగ్ 2 యుద్ధ విమానాన్ని తాము విజయవంతంగా ఢీకొట్టామని ఇరాన్ ప్రకటించింది. ప్రపంచంలోనే ఈ విమానాన్ని తాకిన మొదటి దేశం తామేనని ఇరాన్ పేర్కొంది. ఇరాన్‌కు చెందిన ఇస్లామిక్ రివల్యూషనరీ గార్డ్ కార్ప్స్(IRGC), మధ్య ఇరాన్ గగనతలంపై ఎగురుతున్న అమెరికా ఎఫ్-35 విమానాన్ని తమ అధునాతన రక్షణ వ్యవస్థలతో ఢీకొట్టినట్లు తెలిపింది. ఈ ఘటన తెల్లవారుజామున 2:50 గంటలకు జరిగినట్లు పేర్కొంది. అమెరికా రక్షణ వర్గాలు కూడా ఈ విషయాన్ని పాక్షికంగా ధృవీకరించాయి. ఇరాన్ వైపు నుంచి జరిగిన క్షిపణి దాడుల కారణంగా ఒక ఎఫ్-35 విమానం తీవ్రంగా దెబ్బతిన్నదని, దానిని అత్యవసరంగా మధ్యప్రాచ్యంలోని ఒక బేస్‌లో ల్యాండ్ చేసినట్లు వెల్లడించాయి.
విమానం సురక్షితంగా ల్యాండ్ అయిందని, పైలట్ క్షేమంగా ఉన్నారని అమెరికా సెంట్రల్ కమాండ్ ప్రతినిధి కెప్టెన్ టిమ్ హాకిన్స్ తెలిపారు. ప్రస్తుతం ఈ ఘటనపై విచారణ జరుగుతోంది. ఎఫ్-35 అనేది రాడార్లకు చిక్కని "స్టెల్త్" సాంకేతికత కలిగిన అత్యంత ఖరీదైన (సుమారు 100 మిలియన్ డాలర్లు) విమానం. దీనిని ఇరాన్ లక్ష్యంగా చేసుకోవడం రక్షణ రంగ నిపుణులను విస్మయానికి గురిచేస్తోంది.
ఈ యుద్ధం ప్రారంభమైనప్పటి నుంచి అమెరికా తన మూడు ఎఫ్-15 (F-15) విమానాలను కువైట్ రక్షణ వ్యవస్థల పొరపాటు వల్ల కోల్పోగా, ఒక కేసీ-135 (KC-135) ఇంధన విమానం ఇరాక్‌లో కూలిపోయింది.
