డైలీ భారత్, కామారెడ్డి: కామారెడ్డి పట్టణంలో సంచలనం సృష్టించిన మహిళ హత్య కేసును పోలీసులు శాస్త్రీయ దర్యాప్తుతో ఛేదించారు. ఈ కేసులో నిందితుడిని అరెస్ట్ చేసి కోర్టులో హాజరుపరిచారు.

జిల్లా ఎస్పీ యం. రాజేష్ చంద్ర, IPS ఆదేశాల మేరకు డీఎస్పీ మధుసూదన్ పర్యవేక్షణలో టౌన్ సీఐ బి. నరహరి నేతృత్వంలో రెండు ప్రత్యేక బృందాలు రంగంలోకి దిగాయి.

కేసు వివరాలు:

31.05.2026న పోతారం గ్రామానికి చెందిన నర్సాపురం రాజం తన భార్య నర్సాపురం శ్యామల కనిపించడం లేదని ఫిర్యాదు చేశాడు. కూలి పనికి వచ్చిన వారిలో శ్యామలకు పని దొరకలేదు. సాయంత్రానికి ఫోన్ స్విచ్ ఆఫ్ రావడంతో అనుమానం వచ్చి పోలీసులను ఆశ్రయించాడు.

03.06.2026న గ్రీన్ సిటీ సమీపంలోని రైల్వే ట్రాక్ పక్కన గుర్తు తెలియని మహిళ మృతదేహం లభ్యమైంది. కుటుంబ సభ్యులు దానిని శ్యామలగా గుర్తించారు. తలపై తీవ్ర గాయాలు ఉండటంతో కేసును హత్యగా మార్చారు.

నిందితుడి అరెస్ట్:

సీసీటీవీ ఫుటేజీలు, టెక్నికల్ ఎవిడెన్స్ ఆధారంగా పోలీసులు దర్యాప్తు చేశారు. 17.07.2026న కామారెడ్డి లేబర్ అడ్డా వద్ద పిట్ట నర్సింలు @ పిట్టల నర్సింలు ను అరెస్ట్ చేశారు. అతను మొదట తన పేరు "మామిడి రాజయ్య" అని చెప్పి తప్పించుకునే ప్రయత్నం చేశాడు.

హత్యకు కారణం:

విచారణలో నిందితుడు శ్యామలతో పరిచయం ఉందని చెప్పాడు. ఆమె మరొకరితో సన్నిహితంగా ఉండటం చూసి అసూయతో 03.06.2026న గ్రీన్ సిటీ వద్ద రైల్వే ట్రాక్ పక్కకు తీసుకెళ్లి రాయితో కొట్టి చంపినట్లు ఒప్పుకున్నాడు. అనంతరం ఆమె ఫోన్ అమ్మి వచ్చిన డబ్బుతో మద్యం కొన్నాడు.

నిందితుడిపై నిజామాబాద్, బాసరలో గతంలోనూ దోపిడీ, హత్య కేసులు ఉన్నాయి.

అధికారుల ప్రశంస:

ఈ కేసును త్వరగా ఛేదించిన సీఐ బి. నరహరి, ఏఎస్ఐ రంగారావు, కానిస్టేబుళ్లను ఎస్పీ అభినందించారు.

పోలీసుల సూచన:

కూలి పనికి వెళ్లేవారు తమ కదలికలను కుటుంబానికి తెలియజేయాలి. అనుమానాస్పదంగా ఏమైనా కనిపిస్తే వెంటనే డయల్ 112 కు ఫోన్ చేయాలని సూచించారు.