డైలీ భారత్ న్యూస్, నిజామాబాద్: శ్రీ దేవీశరన్నవరాత్రుల మహర్నవమి సందర్భంగా నగరంలోని శ్రీ వారాహి మాత ఆలయంలో విశేష పూజా కార్యక్రమాలు భక్తిశ్రద్ధల మధ్య ఘనంగా నిర్వహించబడ్డాయి. సాయంత్రం 7.30 గంటల నుండి రాత్రి 9 గంటల వరకు ప్రత్యేక అభిషేకాలు, పుష్పార్చన, మంగళహారతి నిర్వహించగా అనంతరం శ్రీ వారాహి మూల మంత్ర హవనం వైభవంగా జరిగింది. భక్తులు పెద్ద సంఖ్యలో హాజరై అమ్మవారి దర్శనం చేసుకుని ఆధ్యాత్మిక పరవశాన్ని పొందారు. ఈ సందర్భంగా ఆలయ చైర్మన్ మంచాల జ్ఞానేందర్ మాట్లాడుతూ, వారాహి అమ్మవారి ఆశీర్వాదం పొందినవారికి జీవితం సాఫల్యం అవుతుందని, నవరాత్రులు భక్తి, శక్తి, జ్ఞానం కలిసే పర్వదినాలు కావడంతో ప్రతి కుటుంబం ఈ సమయాన్ని పవిత్రతతో, సత్సంకల్పాలతో గడపాలని సూచించారు. అలాగే అమ్మవారి కృపతో నిజామాబాద్ మరింత ఆధ్యాత్మిక క్షేత్రంగా వెలుగొందుతోందని, ఈ ఉత్సవాల్లో పాల్గొన్న ప్రతి భక్తుడికి అమ్మవారి దయాభిక్ష లభించాలని ఆకాంక్షించారు.
కార్యక్రమం అనంతరం భక్తులకు అల్పాహారం విందు చేశారు.
