డైలీ భారత్, హైదరాబాద్: హైదరాబాద్‌లో అవినీతి నిరోధక శాఖ (ఏసీబీ) అధికారులు నిర్వహించిన ఆకస్మిక దాడిలో జీహెచ్ఎంసీ అకౌంట్స్ విభాగానికి చెందిన ఒక అధికారి లంచం తీసుకుంటూ పట్టుబడ్డాడు. సికింద్రాబాద్ జోనల్ కార్యాలయంలో పనిచేస్తున్న జీహెచ్ఎంసీ అకౌంట్స్ సెక్షన్ ఎగ్జామినర్‌ను ఏసీబీ అధికారులు రెడ్ హ్యాండెడ్‌గా అరెస్ట్ చేశారు.
అధికారుల వివరాల ప్రకారం, ఒక ఉద్యోగికి సంబంధించిన రిటైర్మెంట్ బెనిఫిట్స్ ఫైల్‌ను జీహెచ్ఎంసీ ప్రధాన కార్యాలయానికి పంపించేందుకు ఆ అధికారి ₹40,000 లంచం డిమాండ్ చేశాడు. చర్చల అనంతరం ₹35,000 తీసుకుంటూ ఉండగా ఏసీబీ అధికారులు పన్నిన ఉచ్చులో చిక్కుకున్నాడు.
లంచం మొత్తాన్ని స్వాధీనం చేసుకున్న అధికారులు నిందితుడిని అరెస్ట్ చేసి, అతనిపై అవినీతి నిరోధక చట్టాల ప్రకారం కేసు నమోదు చేశారు. ఈ ఘటనకు సంబంధించి మరిన్ని వివరాలను తెలుసుకునేందుకు అధికారులు దర్యాప్తు కొనసాగిస్తున్నారు.
