క‌బ్జాల‌ను తొల‌గించి 6 గుంట‌ల భూమికి హైడ్రా ఫెన్సింగ్‌

డైలీ భారత్, హైదరాబాద్: పోలీసు స్టేష‌న్‌కు కేటాయించిన స్థ‌లాన్ని హైడ్రా కాపాడింది. రంగారెడ్డి జిల్లా, ఉప్పల్ మండలం, కొత్తపేట్ గ్రామంలోని సర్వే నంబర్లు 135, 136లో 6 గుంట‌ల స్థ‌లాన్ని చైతన్యపురి పోలీస్ స్టేషన్‌కు కేటాయించారు.  సర్వే నంబర్ 135లో 4 గుంటలు, సర్వే నంబర్ 136లో 2 గుంటలు కలిపి మొత్తం 6 గుంటల భూమిని పోలీసు స్టేష‌న్ ఏర్పాటుకు నిర్ణ‌యించారు. సర్వే నంబర్ 135లోని 4 గుంటల ప్రభుత్వ భూమిని కొందరు ఆక్రమించుకుని షెడ్లు నిర్మించారు. ఆక్ర‌మ‌ణ‌లు తొల‌గించి పోలీసు స్టేష‌న్‌కు కేటాయించిన భూమిని కాపాడాల‌ని హైడ్రాను పోలీసు శాఖ కోరింది.  హైడ్రా అధికారులు క్షేత్ర స్థాయిలో ప‌రిశీలించి క‌బ్జాల‌ను నిర్ధారించుకుంది.  బుధ‌వారం హైడ్రా బృందాలు రంగంలోకి దిగి షెడ్డుల‌ను తొల‌గించింది. ఆక్రమణలు మళ్లీ జరగకుండా సర్వే నంబర్లు 135, 136లోని మొత్తం 6 గుంటల స్థలానికి  హైడ్రా ఫెన్సింగ్ ఏర్పాటు చేసింది. పోలీసు స్టేష‌న్ కోసం కేటాయించిన భూమిగా పేర్కొంటూ బోర్డులు ఏర్పాటు చేసింది.