చత్రపతి శివాజీ మహారాజ్ సేవా సంఘం ఆధ్వర్యంలో ఉచిత కంటి వైద్య శిబిరం

డైలీ భారత్, భద్రాద్రి కొత్తగూడెం: కొత్తగూడెం ప్రజలందరి ఆరోగ్య దృష్టిని కాపాడే ఉద్దేశంతో ఏర్పాటు చేసిన ఉచిత కంటి వైద్య శిబిరం అందరికీ ఓ వరం లాంటిది. అరుదైన ఈ అవకాశాన్ని తప్పకుండా వినియోగించుకొని, మీ కంటి ఆరోగ్యాన్ని పరిరక్షించుకోవాలని చత్రపతి శివాజీ మహారాజ్ సేవా సంఘ కమిటీ సభ్యులు కోరారు. హైదరాబాద్ లోని శంకర్ శంకర్ కంటి ఆస్పత్రి సౌజన్యంతొ 8వ తేదిన ఆదివారం  చత్రపతి శివాజీ మహారాజ్ సేవా సంఘం ఆధ్వర్యంలో కొత్తగూడెంలో ఉచిత కంటి వైద్య శిబిరం నిర్వహిస్తున్నట్లు కమిటీ సభ్యులు తెలిపారు. పట్టణంలోని రైతు బజార్ పోచమ్మ తల్లి గుడి వద్ద ఆదివారం ఉదయం 7 గంటల నుండి మధ్యాహ్నం 1 గంట వరకు వైద్య శిబిరం కొనసాగుతుందని కొత్తగూడెం పట్టణ, పరిసర గ్రామాల ప్రజలు వైద్య శిబిరాన్ని సద్వినియోగం చేసుకోవాలని కోరారు. కాగా గతంలో విడతల వారీగా ఏర్పాటు శిబిరాల్లో  వేలాది మంది కంటి పరీక్షలు చేసుకోగా ఇప్పటి వరకు 600 మందికి పైగా వ్యక్తులకు కంటి ఆపరేషన్ లు చేయించినట్టు వారు వివరించారు. ఈ సందర్బంగా నిర్వాహకులు మాట్లాడుతు నిరుపేదలకు ఇలాంటి క్యాంపుల ద్వారా ఉచిత వైద్యం అందించడం తమ బాధ్యత అన్నారు. రాబోయే రోజుల్లో మరిన్ని సేవా కార్యక్రమాలు నిర్వహిస్తామని తెలియజేశారు. ఈ కార్యక్రమంలో ఛత్రపతి శివాజీ మహారాజ్ సేవ సంఘం రేఖ రాజశేఖర్, గునిగంటి చందర్, నమ్మి జగదీష్, పెద్దిరెడ్డి సుంకు కనకరాజు తదితరులు పాల్గొన్నారు.