డైలీ భారత్, హుజూర్ నగర్: హుజూర్ నగర్ మున్సిపల్ నూతన చైర్మన్‌ మరియు వైస్ చైర్మన్‌ ఎన్నిక  పూర్తయింది చైర్మన్‌ అభ్యర్థిగా దొంతగాని శ్రీనివాస్ గౌడ్ పేరును 21వ వార్డు కౌన్సిలర్ తన్నీరు మల్లికార్జున్ రావు ప్రతిపాదించిగా 23వార్డు కౌన్సిలర్ అట్లూరి మంజుల బలపర్చారు. ఇతరులెవ్వరు పోటీలో లేని కారణంగా దొంతగాని శ్రీనివాస్ గౌడ్ ఎన్నిక ఏకగ్రీవమైంది. దీంతో హుజూర్ నగర్ మున్సిపాలిటీ నూతన చైర్మన్‌గా దొంతగాని శ్రీనివాస్ గౌడ్ ఎన్నికయ్యారు. 

అనంతరం మున్సిపల్ వైస్ చైర్మన్‌గా తన్నీరు మల్లికార్జున్ రావు పేరును 28వ వార్డు కౌన్సిలర్ నందిగామ శ్రీనివాస్ ప్రతిపాదించగా 27వ వార్డు కౌన్సిలర్ తండు ప్రసాద్ బలపర్చారు. పోటీలో ఇతరులెవ్వరు లేని కారణంగా తన్నీరు మల్లికార్జున్ రావు ఎన్నిక ఏకగ్రీవమవ్వగా హుజూర్ నగర్ మున్సిపాలిటీ నూతన వైస్ చైర్మన్‌గా తన్నీరు మల్లికార్జున్ రావు ఏకగ్రీవంగా ఎన్నికయ్యారు.

హుజూర్ నగర్ మున్సిపల్ చైర్మన్ పదవీ బాధ్యతలు స్వీకరించిన అనంతరం ఏర్పాటు చేసిన సమావేశంలో శ్రీనివాస్ గౌడ్ మాట్లాడుతూ...విజయం కేవలం వ్యక్తిగత గెలుపు కాదని ప్రజలు ఇచ్చిన రాజకీయ తీర్పు అని శ్రీనివాస్ అన్నారు. ఈ ఫలితం స్థానిక రాజకీయాల్లో స్పష్టమైన మార్పుకు సంకేతమని ప్రజలు అభివృద్ధి మరియు బాధ్యతాయుతమైన పాలనకే మద్దతు ఇచ్చారని తెలిపారు. మున్సిపాలిటీ సమగ్ర అభివృద్ధి ప్రజలకు మెరుగైన మౌలిక సదుపాయాల కల్పన మరియు పారదర్శక పరిపాలన తమ ప్రధాన లక్ష్యమని ప్రజల విశ్వాసాన్ని నిలబెట్టుకునే విధంగా ప్రతి నిర్ణయం తీసుకుంటామని  దొంతగాని  తెలిపారు.