డైలీ భారత్, చందుర్తి: చందుర్తి మండలంలోని సనుగుల గ్రామానికి చెందిన గొట్టే పరిమిళ ఆర్థిక ఇబ్బందులతో ఉరివేసుకొని ఆత్మహత్యకు పాల్పడిందని స్థానికులు చెబుతున్నారు. స్థానికుల కథనం ప్రకారం.. గొట్టే పరిమళ(39) దేవుని తండా గ్రామంలో గత 23 సంవత్సరాలుగా అంగన్వాడి ఉపాధ్యాయురాలుగా విధులు నిర్వహిస్తుందని తెలిపారు. తనకు కొంతకాలంగా ఆరోగ్య సమస్యలు, ఆర్థిక ఇబ్బందులు ఉండేవని, ఆరోగ్య సమస్యల నుంచి ఇప్పుడిప్పుడే కుదుటపడుతున్న సమయంలో, ఇలా చేసుకోవడం చాలా బాధాకరంగా ఉన్నదని తన సహచరులు, స్థానికులు తెలిపారు. అలాగే తనకి ఇద్దరు కుమారులు. మొదటి కొడుకు శరత్ కుమార్‌కు 20 సంవత్సరాలు కాగా రెండవ కొడుకు శుసంక్‌కు 14 సంవత్సరాలు. పరిమళ భర్త నరేష్ ఆర్టీసీలో ప్రైవేటు డ్రైవర్‌గా పని చేస్తుండడంతో రోజులాగే ఈరోజు కూడా ఉదయం 6గంటల సమయంలో ఇంట్లో నుండి వెళ్ళాడని, ఇంట్లో ఎవరూ లేని సమయంలో ఉరి వేసుకుని ఆత్మహత్యకు పాల్పడి ఉండవచ్చునని చెబుతున్నారు. ఘటన స్థలానికి పోలీసులు చేరుకొని మృతదేహాన్ని పోస్టుమార్టం నిమిత్తం వేములవాడ ఏరియా ఆసుపత్రికి తరలించారు. ప్రస్తుతం పోలీసులు దర్యాప్తు ప్రారంభించారు. ఇక పరిమళ ఆత్మహత్య కుటుంబంలో తీరని బాధను మిగిల్చి వెళ్లిపోయిందని స్థానికులు చెబుతున్నారు.
ఈ ఘటనకు సంబంధించిన పూర్తి వివరాలు తెలియాల్సి ఉంది
