చుక్కల మందు తప్పనిసరి
దేశవ్యాప్తంగా మెగా డ్రైవ్ ప్రారంభం
41 లక్షల చిన్నారులే లక్ష్యం..
తెలంగాణలో 22 వేల పోలియో బూత్‌లు సిద్ధం
పోలియోపై మరోసారి దేశవ్యాప్త పోరాటం.. తెలంగాణలో 41 లక్షల చిన్నారులకు చుక్కల మందు
డైలీ భారత్, హైదరాబాద్ డెస్క్ :దేశాన్ని పోలియో రహితంగా కొనసాగించేందుకు కేంద్ర ప్రభుత్వం ప్రతిష్టాత్మకంగా నిర్వహిస్తున్న పల్స్ పోలియో కార్యక్రమం ఆదివారం దేశవ్యాప్తంగా ప్రారంభమైంది. ఐదేళ్లలోపు చిన్నారులందరికీ ఉచితంగా పోలియో చుక్కల మందు అందించే ఈ కార్యక్రమంలో తెలంగాణతో పాటు అన్ని రాష్ట్రాలు భాగస్వామ్యమయ్యాయి.
తెలంగాణలో సుమారు 41 లక్షల మంది చిన్నారులకు పోలియో చుక్కలు వేయడమే లక్ష్యంగా వైద్య ఆరోగ్య శాఖ భారీ ఏర్పాట్లు చేసింది. రాష్ట్రవ్యాప్తంగా 22 వేలకుపైగా పోలియో బూత్‌లు ఏర్పాటు చేయగా, ప్రభుత్వ ఆసుపత్రులు, ప్రాథమిక ఆరోగ్య కేంద్రాలు, అంగన్‌వాడీ కేంద్రాలు, పాఠశాలలు, బస్టాండ్లు, రైల్వే స్టేషన్లు, విమానాశ్రయాల్లో ప్రత్యేక బూత్‌లు అందుబాటులోకి వచ్చాయి.
ప్రయాణాల్లో ఉన్న చిన్నారులు కూడా వ్యాక్సిన్‌కు దూరం కాకుండా మొబైల్ బృందాలను ఏర్పాటు చేశారు. వైద్య సిబ్బంది, ఆశా కార్యకర్తలు, అంగన్‌వాడీ సిబ్బంది, వాలంటీర్లు పెద్ద ఎత్తున ఈ కార్యక్రమంలో పాల్గొంటున్నారు.
ప్రతి చిన్నారికి రెండు చుక్కలు.. జీవితాంతం రక్షణ
పోలియో వైరస్ వల్ల శాశ్వత అంగవైకల్యం ఏర్పడే ప్రమాదం ఉన్నందున, ప్రతి చిన్నారికి తప్పనిసరిగా చుక్కల మందు వేయాలని వైద్య నిపుణులు సూచిస్తున్నారు. ఇప్పటికే భారత్ పోలియో రహిత దేశంగా గుర్తింపు పొందినప్పటికీ, ఆ స్థితిని కొనసాగించేందుకు ప్రతి సంవత్సరం ఈ కార్యక్రమాన్ని ప్రభుత్వం నిర్వహిస్తోంది.
ఇంటింటికీ ఆరోగ్య సిబ్బంది
ఈ రోజు పోలియో బూత్‌కు రాలేని చిన్నారుల కోసం రేపటి నుంచి ఇంటింటికీ వెళ్లి ఆరోగ్య సిబ్బంది చుక్కల మందు వేయనున్నారు. ఒక్క చిన్నారి కూడా మిగలకుండా ప్రత్యేక చర్యలు తీసుకుంటున్నారు.
"ఐదేళ్లలోపు ప్రతి చిన్నారికి పోలియో చుక్కలు వేయించడం తల్లిదండ్రుల బాధ్యత. రెండు చుక్కలు.. జీవితాంతం రక్షణ" అని వైద్య ఆరోగ్య శాఖ అధికారులు విజ్ఞప్తి చేశారు.
