పేదల ఇళ్లకు ఇసుక లేదు... బడా బాబుల భవనాలకు మాత్రం పట్టపగలే జోరుగా ఇసుక!..

డైలీ భారత్, అశ్వాపురం: మండలంలో ప్రభుత్వం ప్రతిష్టాత్మకంగా చేపట్టిన ఇందిరమ్మ ఇళ్ల నిర్మాణాలకు అవసరమైన ఇసుక అందక లబ్ధిదారులు తీవ్ర ఇబ్బందులు ఎదుర్కొంటున్నారు. గోదావరి నది సమీపంలో ఉన్నప్పటికీ ఇళ్ల నిర్మాణాలకు కావాల్సిన ఇసుక దొరకడం లేదని పలువురు ఇందిరమ్మ ఇండ్ల లబ్ధిదారులు ఆవేదన వ్యక్తం చేస్తున్నారు.

ఇందిరమ్మ ఇళ్ల నిర్మాణ పనులు ఇసుక కొరత కారణంగా నత్తనడకన సాగుతుండగా, కొంతమంది బడా బాబులు నిర్మిస్తున్న ప్రైవేట్ భవనాలకు మాత్రం పట్టపగలే ట్రాక్టర్లు, లారీల ద్వారా ఇసుక తరలింపు జరుగుతుండటం మండలంలో చర్చనీయాంశంగా మారింది. ప్రభుత్వ పథకం కింద ఇళ్లు నిర్మించుకునే పేదలకు ఇసుక అందకపోవడం, మరోవైపు భారీ నిర్మాణాలకు ఎలాంటి ఆటంకం లేకుండా సరఫరా కొనసాగుతుండటంపై ప్రజలు పలు అనుమానాలు వ్యక్తం చేస్తున్నారు. ఇసుక పంపిణీలో పారదర్శకత పాటిస్తున్నారా? ప్రభుత్వ పథకాల లబ్ధిదారులకు ప్రాధాన్యత ఇస్తున్నారా? అనే ప్రశ్నలు స్థానికంగా వినిపిస్తున్నాయి. సంబంధిత అధికారులు స్పందించి ఇందిరమ్మ ఇళ్ల లబ్ధిదారులకు ఇసుక అందుబాటులో ఉండేలా చర్యలు తీసుకోవాలని మండల ప్రజలు కోరుతున్నారు.