డైలీ భారత్, రాజ్‌పురా (పంజాబ్):అమృత్‌సర్ నుండి పశ్చిమ బెంగాల్‌లోని న్యూ జల్‌పాయ్‌గుడి వైపు వెళ్తున్న 12508 కర్మభూమి ఎక్స్‌ప్రెస్ రైలులో శుక్రవారం మధ్యాహ్నం భారీ అగ్నిప్రమాదం సంభవించింది. పంజాబ్‌లోని పటియాలా జిల్లా రాజ్‌పురా సమీపంలోని సారాయ్ బంజారా రైల్వే స్టేషన్ వద్ద రైలు ప్రయాణిస్తుండగా ఈ ప్రమాదం చోటుచేసుకుంది. రైలులోని నాలుగు జనరల్ బోగీలకు మంటలు వేగంగా వ్యాపించడంతో తీవ్ర కలకలం రేగింది.
సమయోచిత నిర్ణయం.. తప్పిన ప్రాణనష్టం
మధ్యాహ్నం 1:00 గంటల ప్రాంతంలో రైలు రన్నింగ్‌లో ఉండగానే బోగీల్లో ఒక్కసారిగా దట్టమైన పొగలు, మంటలు చెలరేగాయి. దీనిని గమనించిన లోకో పైలట్ అత్యంత అప్రమత్తంగా వ్యవహరించి రైలును వెంటనే నిలిపివేశారు. రైలు ఆగడమే ఆలస్యం.. బోగీల్లోని ప్రయాణికులు భయాందోళనలతో కిందకు దూకారు. మంటల తీవ్రత ఎక్కువగా ఉన్నప్పటికీ, లోకో పైలట్ సకాలంలో స్పందించడం వల్ల రైలులో ఉన్న దాదాపు 1,500 మంది ప్రయాణికులు ఎటువంటి గాయాలు కాకుండా సురక్షితంగా ప్రాణాలతో బయటపడ్డారు.
బూడిదైన నాలుగు బోగీలు.. వస్తువులు వదిలేసి పరుగులు
మంటలు క్షణాల్లో విస్తరించడంతో మూడు జనరల్ బోగీలు పూర్తిగా అగ్నికి ఆహుతవ్వగా, నాల్గవ బోగీ పాక్షికంగా దెబ్బతింది. ప్రాణాలు కాపాడుకునే క్రమంలో ప్రయాణికులు తమ విలువైన సామాగ్రి, వస్తువులను రైలులోనే వదిలేసి పరుగులు తీశారు.
రంగంలోకి సహాయక చర్యలు
సమాచారం అందిన వెంటనే రైల్వే ఉన్నతాధికారులు, అగ్నిమాపక సిబ్బంది మరియు పటియాలా డిప్యూటీ కమిషనర్ హిమాన్షు అగర్వాల్ ఆధ్వర్యంలోని రెస్క్యూ టీమ్‌లు ఘటనా స్థలానికి చేరుకున్నాయి. ఫైర్ ఇంజన్ల సహాయంతో సిబ్బంది మంటలను అదుపులోకి తెచ్చారు.
కారణాలపై దర్యాప్తు
ఈ ప్రమాదం షార్ట్ సర్క్యూట్ వల్ల జరిగిందా? లేదా మరేదైనా కారణం ఉందా? అనే కోణంలో రైల్వే శాఖ మరియు స్థానిక పోలీసులు ఉన్నత స్థాయి దర్యాప్తును ప్రారంభించారు. ప్రమాదానికి గురైన బోగీలను వేరు చేసి, ప్రయాణికులను సురక్షితంగా గమ్యస్థానాలకు చేర్చేందుకు ప్రత్యామ్నాయ ఏర్పాట్లు చేస్తున్నారు.
#డైలీభారత్ #KarmabhoomiExpress #TrainFire #Punjab #DailyBharath
