నిజామాబాద్ యువతి కేసులో యశోద వైద్యుల విజయం
డైలీ భారత్ కామారెడ్డి: నిజామాబాద్ జిల్లాకు చెందిన గిరిజన యువతి ప్రాణాన్ని సకాలంలో చేసిన చికిత్సతో యశోద హాస్పిటల్ వైద్యులు కాపాడారు. ఈ వివరాలను కామారెడ్డి జిల్లా కేంద్రంలోని యశోద హాస్పిటల్ ఓపి సెంటర్‌లో మంగళవారం నిర్వహించిన ప్రెస్ మీట్‌లో వైద్యులు వెల్లడించారు.
ఆ యువతి Thrombotic Thrombocytopenic Purpura - TTP అనే అరుదైన రక్త వ్యాధితో బాధపడుతోంది. ఈ వ్యాధిలో రక్తంలో ప్లేట్‌లెట్లు విపరీతంగా తగ్గిపోయి, శరీరంలో చిన్న చిన్న రక్త గడ్డలు ఏర్పడతాయి. దీనివల్ల కీలక అవయవాలకు రక్త సరఫరా ఆగిపోయి ప్రాణాపాయం సంభవించవచ్చు.
రోగిని పరీక్షించిన వెంటనే యశోద హాస్పిటల్స్ సోమాజిగూడ బృందం Therapeutic Plasma Exchange చికిత్స మొదలుపెట్టింది. దీనితో పాటు స్టెరాయిడ్ థెరపీ మరియు సపోర్టివ్ మందులు ఇచ్చారు.
వైద్యానికి బాగా స్పందించిన రోగి ప్లేట్‌లెట్ కౌంట్ క్రమంగా పెరిగింది. ప్రస్తుతం ఆమె ఆరోగ్యం నిలకడగా ఉందని వైద్యులు తెలిపారు.
డా. జి. విద్యుత్ కుమార్, కన్సల్టెంట్ క్లినికల్ హెమటాలజిస్ట్ & BMT ఫిజీషియన్ మాట్లాడుతూ, “TTP లాంటి అరుదైన వ్యాధులను తొందరగా గుర్తించి చికిత్స ఇస్తే ప్రాణాలు కాపాడవచ్చు. ప్లాస్మా ఎక్స్చేంజ్ ఇందులో కీలక పాత్ర పోషిస్తుంది” అని చెప్పారు.
యశోద గ్రూప్ గత 30 ఏళ్లుగా హైదరాబాద్‌లో అత్యాధునిక సదుపాయాలతో వేలాది మందికి వైద్య సేవలు అందిస్తోందని ఆయన వివరించారు.
ఈ ప్రెస్ మీట్‌లో అరుదైన రక్త వ్యాధుల లక్షణాలు, సకాలంలో చికిత్స ప్రాముఖ్యతపై వైద్యులు అవగాహన కల్పించారు.
