స్టైపెండ్ పెంపు డిమాండ్... 

మెడికో ప్రియాంక మృతితో మిన్నంటిన ఆగ్రహం!

డైలీ భారత్, అమరావతి / రాజమహేంద్రవరం: ఆంధ్రప్రదేశ్‌లో జూనియర్ డాక్టర్లు (జూడాలు) తమ డిమాండ్ల సాధనకై ఉధృత ఆందోళనకు దిగారు. రాష్ట్రంలోని అన్ని ప్రభుత్వ వైద్య కళాశాలలు, బోధనాసుపత్రుల్లో నేటి (ఆగస్టు 10) నుంచి జూనియర్ డాక్టర్లు నల్ల బ్యాడ్జీలు, నల్ల రిబ్బన్లు ధరించి విధులకు హాజరవుతూ నిరసనలు ప్రారంభించారు ఆంధ్రప్రదేశ్ జూనియర్ డాక్టర్స్ అసోసియేషన్ (ఆబ్జుడా) పిలుపు మేరకు రోగులకు ఇబ్బంది కలగకుండా ప్రస్తుతం దశల వారీగా ఈ ఆందోళనలు చేపట్టారు

జూనియర్ డాక్టర్ల ప్రధాన డిమాండ్లు:

స్టైపెండ్ పెంపు: పెరుగుతున్న నిత్యావసరాల ధరలకు అనుగుణంగా ఇంటర్నీలు, పీజీ మెడికల్ విద్యార్థుల స్టైపెండ్లను వెంటనే సవరించాలి

పనిభారం తగ్గింపు: అండర్ గ్రాడ్యుయేట్, పోస్ట్ గ్రాడ్యుయేట్ విద్యార్థులపై ఉన్న 36 గంటల అమానవీయ పనిభారాన్ని తక్షణమే తగ్గించాలి

వైద్యుల భద్రత: ప్రభుత్వ ఆసుపత్రులలో వైద్యులకు, ముఖ్యంగా మహిళా వైద్యులకు పటిష్టమైన రక్షణ కల్పించాలి.

మౌలిక వసతులు: మెడికల్ కాలేజీల్లో మౌలిక సదుపాయాలను మెరుగుపరచాలి.

ప్రభుత్వంతో చర్చలు జరిగినప్పటికీ, స్పష్టమైన ఉత్తర్వులు వచ్చే వరకు తమ నిరసనలు కొనసాగుతాయని ఆబ్జుడా ప్రతినిధులు స్పష్టం చేశారు. 

మెడికో ప్రియాంక మృతితో నిరసనల సెగ!

ఈ నిరసనల నడుమే, రాజమహేంద్రవరంలో జరిగిన ఘోర రోడ్డు ప్రమాదంలో పీజీ మెడికల్ విద్యార్థిని డాక్టర్ ప్రియాంక మృతి చెందడం వైద్య రంగంలో తీవ్ర కలకలం రేపింది

ఆగస్టు 3 రాత్రి డాక్టర్ ప్రియాంక తన స్నేహితుడితో కలిసి స్కూటర్ పై వెళ్తుండగా, మద్యం మత్తులో ఉన్న ఇద్దరు యువకులు కారుతో వీరిని బలంగా ఢీకొట్టారు. తీవ్ర గాయాలపాలైన ప్రియాంక "బ్రెయిన్ డెడ్" కాగా, చికిత్స పొందుతూ ఆగస్టు 9న తుదిశ్వాస విడిచింది. ఈ ఘటనపై ముఖ్యమంత్రి నారా చంద్రబాబు నాయుడు తీవ్ర దిగ్భ్రాంతి వ్యక్తం చేస్తూ, నిందితులపై కఠిన చర్యలు తీసుకోవాలని ఆదేశించారు పోలీసులు ఇప్పటికే నిందితులను అరెస్ట్ చేశారు

వైద్యుల రక్షణ, ప్రియాంకకు న్యాయం చేయాలనే డిమాండ్‌తో కాకినాడలో గైనకాలజిస్టులు, జూనియర్ డాక్టర్లు భారీ వాకథాన్ నిర్వహించారు. వైద్యులపై జరుగుతున్న దాడులు, రోడ్డుపై ఆకతాయిల ఉన్మాదానికి వ్యతిరేకంగా కఠిన చట్టాలు తీసుకురావాలని వారు డిమాండ్ చేస్తున్నారు. 

వైద్య సేవలపై ప్రభావం

జూనియర్ డాక్టర్లు ప్రస్తుతం ఉదయం పూట నల్లబ్యాడ్జీలతో నిరసన తెలుపుతూ విధుల్లో పాల్గొంటున్నారు. అయితే, ప్రభుత్వం సానుకూలంగా స్పందించి స్టైపెండ్ ఉత్తర్వులు ఇవ్వకపోతే సమ్మెను తీవ్రతరం చేస్తామని హెచ్చరించడంతో, రోగుల ఓపీ (OPD) సేవలకు ఇబ్బంది కలగకుండా సీనియర్ వైద్యులతో ప్రత్యామ్నాయ ఏర్పాట్లు చేసేందుకు వైద్య శాఖ సిద్ధమవుతోంది.