డైలీ భారత్, అనంతపురం ఇంటర్నెట్ డెస్క్:అనంతపురం జిల్లాలో ఆదివారం తెల్లవారుజామున ఒక భయంకరమైన రోడ్డు ప్రమాదం చోటుచేసుకుంది. జాతీయ రహదారి 44 (NH-44) పై ప్రయాణిస్తున్న ఒక ప్రైవేట్ లగ్జరీ ట్రావెల్స్ బస్సు, ఐషర్ ట్రక్కు పరస్పరం బలంగా ఢీకొట్టుకున్నాయి. ప్రమాద తీవ్రత ఎంతలా ఉందంటే.. రెండు వాహనాలు నియంత్రణ కోల్పోయి నేరుగా పొగురూరు బ్రిడ్జి (కల్వర్టు) పైనుంచి కిందకు పడిపోయాయి. ఈ ఘోర దుర్ఘటనలో దాదాపు 20 మంది ప్రయాణికులు తీవ్రంగా గాయపడ్డారు.

నిద్రమత్తులో ఘోరం.. బ్రిడ్జిపై నుంచి కిందకు... 

పోలీసులు మరియు స్థానికులు తెలిపిన వివరాల ప్రకారం.. హైదరాబాద్ నుంచి బెంగళూరు వైపు సుమారు 40 మంది ప్రయాణికులతో వెళ్తున్న ప్రైవేట్ ఓల్వో లగ్జరీ బస్సు, పామిడి మండలం పొగురూరు గ్రామ సమీపంలోని బ్రిడ్జిపైకి రాగానే ఈ ప్రమాదం జరిగింది. ఎదురుగా వస్తున్న ఐషర్ వాహనం బస్సును బలంగా ఢీకొట్టింది. తెల్లవారుజామున ప్రయాణికులంతా గాఢ నిద్రలో ఉన్న సమయంలో ఈ ప్రమాదం జరగడంతో బస్సు ఒక్కసారిగా ఉలిక్కిపడింది. రెండు వాహనాలు బ్రిడ్జి పైనుంచి కింద పడిపోవడంతో బస్సులోని వారు హాహాకారాలు చేశారు. నిద్రమత్తు, అతి వేగమే ఈ ఘోర ప్రమాదానికి కారణమని ప్రాథమికంగా భావిస్తున్నారు.

రంగంలోకి పోలీసులు.. డ్రైవర్ల పరిస్థితి విషమం!

ప్రమాదం జరిగిన వెంటనే రోడ్డుపై వెళ్తున్న వాహనదారులు, స్థానికులు అప్రమత్తమై పోలీసులకు సమాచారం అందించారు. హుటాహుటిన ఘటనా స్థలానికి చేరుకున్న పామిడి పోలీసులు స్థానికుల సహాయంతో రెస్క్యూ ఆపరేషన్ చేపట్టారు. వాహనాల్లో నలిగిపోయి ఇరుక్కుపోయిన బస్సు, ఐషర్ డ్రైవర్లను అతికష్టం మీద బయటకు తీశారు. డ్రైవర్లతో పాటు దాదాపు 10 మంది ప్రయాణికుల పరిస్థితి అత్యంత విషమంగా ఉన్నట్లు సమాచారం.

 జాతీయ రహదారిపై భారీగా ట్రాఫిక్ జామ్

క్షతగాత్రులను వెంటనే పామిడి ప్రభుత్వ ఆసుపత్రికి, అక్కడి నుంచి మెరుగైన చికిత్స కోసం అనంతపురం సర్వజన ఆసుపత్రికి తరలించారు. ఈ ప్రమాదం కారణంగా హైదరాబాద్ - బెంగళూరు జాతీయ రహదారిపై కిలోమీటర్ల మేర వాహనాలు నిలిచిపోయి భారీగా ట్రాఫిక్ జామ్ ఏర్పడింది. పోలీసులు క్రేన్ల సహాయంతో ప్రమాదానికి గురైన వాహనాలను పక్కకు తొలగించి, ట్రాఫిక్‌ను క్రమబద్ధీకరించారు. ఈ ఘటనపై పోలీసులు కేసు నమోదు చేసుకుని పూర్తి దర్యాప్తు జరుపుతున్నారు.