బాధితుడికి స్టేషన్ బెయిల్ ఇచ్చేందుకు రూ.30 వేలు లంచం డిమాండ్ చేసిన ఎస్సై... రంగంలోకి దిగిన ఎసిబి అధికారులు

డైలీ భారత్, రాజంపేట (కామారెడ్డి జిల్లా):బాధితుల పక్షాన నిలవాల్సిన ఒక రక్షక భటుడు లంచం అవతారమెత్తి అవినీతి నిరోధక శాఖ (ఏసీబీ) అధికారులకు రెడ్ హ్యాండెడ్‌గా చిక్కాడు. స్టేషన్ బెయిల్ మంజూరు చేయడానికి, కేసు తీవ్రతను తగ్గించడానికి లంచం డిమాండ్ చేసిన కామారెడ్డి జిల్లా రాజంపేట సబ్ ఇన్‌స్పెక్టర్ (SI) దువ్వాల ఆంజనేయులు గురువారం రూ.30,000 నగదు తీసుకుంటూ ఏసీబీ పట్టుబడ్డారు. 

కేసు వివరాలు:

పోలీసుల కథనం ప్రకారం.. రాజంపేట పోలీస్ స్టేషన్ పరిధిలో ఇటీవల నమోదైన ఒక కేసులో ఓ వ్యక్తి కుమారుడిని నిందితుడిగా చేర్చారు. ఈ క్రమంలో సదరు యువకుడికి పోలీస్ స్టేషన్ నుంచే బెయిల్ (స్టేషన్ బెయిల్) మంజూరు చేయడానికి, అలాగే చార్జిషీట్‌లో శిక్ష తీవ్రత తక్కువగా ఉండేలా సానుకూల సెక్షన్లు నమోదు చేయడానికి ఎస్సై ఆంజనేయులు బాధితుడి తండ్రిని రూ.30,000 లంచం డిమాండ్ చేశారు. లంచం ఇవ్వడం ఇష్టం లేని బాధితుడు వెంటనే నిజామాబాద్ రీజియన్ ఏసీబీ అధికారులను ఆశ్రయించి ఫిర్యాదు చేశారు. 

నివాసంలో రెడ్ హ్యాండెడ్‌గా అరెస్ట్:

బాధితుడి ఫిర్యాదుపై ప్రాథమిక విచారణ జరిపిన ఏసీబీ డీఎస్పీ నేతృత్వంలోని బృందం గురువారం పక్కా ప్రణాళికతో రాజంపేటలో నిఘా పెట్టింది. ఎస్సై ఆంజనేయులు సూచనల మేరకు బాధితుడు రసాయనాలు (ఫెనాల్ఫ్తలీన్) పూసిన రూ.30,000 నగదును ఎస్సై నివాసంలో ఆయనకు అందజేశారు. డబ్బులు తీసుకుంటుండగా ఒక్కసారిగా దాడి చేసిన ఏసీబీ అధికారులు ఆయన్ను రెడ్ హ్యాండెడ్‌గా పట్టుకున్నారు. ఎస్సై చేతులకు జరిపిన కెమికల్ పరీక్షల్లో పాజిటివ్ రావడంతో లంచం సొమ్మును స్వాధీనం చేసుకున్నారు. 

కోర్టుకు తరలింపు:

అరెస్ట్ అనంతరం ఏసీబీ అధికారులు రాజంపేట పోలీస్ స్టేషన్‌తో పాటు ఎస్సై నివాసంలో సుదీర్ఘంగా సోదాలు నిర్వహించి కీలక పత్రాలను పరిశీలించారు. ఎస్సై ఆంజనేయులుపై అవినీతి నిరోధక చట్టం కింద కేసు నమోదు చేసినట్లు అధికారులు తెలిపారు. నిందితుడిని వైద్య పరీక్షల అనంతరం హైదరాబాద్ నాంపల్లిలోని ప్రత్యేక ఏసీబీ కోర్టులో హాజరుపరచనున్నట్లు ఏసీబీ డీఎస్పీ వెల్లడించారు. అవినీతికి పాల్పడే ఏ ప్రభుత్వ అధికారినైనా వదిలిపెట్టేది లేదని, ఎవరైనా లంచం డిమాండ్ చేస్తే వెంటనే 1064 టోల్ ఫ్రీ నంబర్‌కు సంప్రదించాలని ఆయన ప్రజలను కోరారు.