డైలీ భారత్, హైదరాబాద్: మీరు “100% స్వచ్ఛమైన నెయ్యి” అని నమ్మి కొంటున్నారా? ఆగండి! హైదరాబాద్‌లో కల్తీ నెయ్యి రాకెట్ భారీగా బయటపడింది.

కమిషనరేట్ టాస్క్‌ఫోర్స్‌కు చెందిన H-FAST టీమ్, ఆహార భద్రతా శాఖతో కలిసి నగరవ్యాప్తంగా ప్రత్యేక దాడులు నిర్వహించింది. ఈ క్రమంలో 130 సంస్థలను తనిఖీ చేయగా షాకింగ్ నిజాలు వెలుగులోకి వచ్చాయి.

ఏం పట్టుకున్నారు?

తనిఖీ చేసిన వాటిలో 39 తయారీ యూనిట్లు, 91 విక్రయ కేంద్రాలు ఉన్నాయి. అక్కడ పామ్ ఆయిల్, వనస్పతి, స్కిమ్డ్ మిల్క్ పౌడర్, స్టార్చ్, కృత్రిమ నెయ్యి ఫ్లేవర్లతో కల్తీ చేస్తున్నట్లు గుర్తించారు. 

మొత్తం 36 టన్నుల కల్తీ సరుకు స్వాధీనం చేసుకున్నారు:

25.5 టన్నుల కల్తీ నెయ్యి

8.7 టన్నుల క్రీమ్

1,200 లీటర్ల పామ్ ఆయిల్, 600 లీటర్ల వనస్పతి

కృత్రిమ ఫ్లేవర్లు, 30 కిలోల స్టార్చ్

ఈ కల్తీ నెయ్యిని “ప్రీమియం నెయ్యి”, “ఫామ్ ఫ్రెష్ నెయ్యి”, “నేచురల్ నెయ్యి” అనే పేర్లతో అమ్ముతున్నారు.

ఎక్కడికి వెళ్తోంది?

10% నుండి 40% వరకు కల్తీ ఉన్న ఈ నెయ్యిని రెస్టారెంట్లు, టిఫిన్ సెంటర్లు, స్వీట్ షాపులు, బేకరీలు, క్యాటరింగ్, డెయిరీ షాపులు మరియు ఆయుర్వేద షాపులకు సరఫరా చేస్తున్నారు. పూజ, దీపం కోసం కూడా ఇదే నెయ్యిని వాడుతున్నారని అధికారులు చెప్పారు.

ఆరోగ్యానికి ప్రమాదం... 

అనధికారిక నూనెలు, రసాయనాలు కలిపిన ఈ నెయ్యి వల్ల గుండె జబ్బులు, జీర్ణ సమస్యలు, కాలేయం, మూత్రపిండాల వ్యాధులు వచ్చే ప్రమాదం ఉందని H-FAST హెచ్చరించింది.

ప్రజలకు సూచన... 

1. పాడి ఉత్పత్తులను లైసెన్స్ ఉన్న, పేరున్న షాపుల్లోనే కొనండి

2. FSSAI నంబర్, తయారీదారు పేరు, బ్యాచ్ నంబర్, Mfg/Exp తేదీ తప్పనిసరిగా చూడండి

3. అనుమానం వస్తే Dial 112 లేదా H-FAST: 8712661212 కు ఫిర్యాదు చేయండి. ఫిర్యాదుదారు వివరాలు గోప్యంగా ఉంటాయి.

ఈ దాడులను DCP గైక్వాడ్ వైభవ్ రఘునాథ్, IPS ఆధ్వర్యంలో ఇన్‌స్పెక్టర్లు N. రంజిత్ కుమార్ గౌడ్, M. అంజయ్య మరియు వారి టీమ్ నిర్వహించారు.