డైలీ భారత్ డెస్క్:ఖమ్మం జిల్లాలోని ఓ గ్రామంలో చికెన్‌ షాపు నడుపుతున్న ఐతనబోయిన ప్రశాంత్‌ (26) ఆన్‌లైన్‌ బెట్టింగ్‌, మద్యపాన వ్యసనాలకు బానిసై ఆర్థికంగా తీవ్ర ఇబ్బందుల్లో ఉన్నాడు. తన షాపు సమీపంలోనే నివసిస్తున్న వృద్ధురాలు సుగుణపై కన్నేశాడు. ఆమె ధరించే బంగారు ఆభరణాల కోసం జూలై 17 రాత్రి ఆమె ఇంట్లోకి చొరబడ్డాడు.

సుగుణ అరుస్తూ ప్రతిఘటించడంతో వెంట తెచ్చుకున్న ఇనుప రాడ్‌తో ఆమెపై దాడి చేసి హత్య చేశాడు. ఆ తర్వాత ఆమె నల్లపూసల హారం నుంచి బంగారు చైన్‌, బంగారు పూసలు తీసుకుని పారిపోయాడు. దోచుకున్న బంగారు చైన్‌ను తన బావ మరదలి సరగండ మహేష్‌ (20, మహబూబాబాద్‌ జిల్లా బాలినిధర్మారం గ్రామం)కు అప్పగించాడు. మహేష్‌ ఆ చైన్‌ను ఖమ్మంలోని ఓ బ్యాంకులో తన పేరుతో తాకట్టు పెట్టి సుమారు రూ.1.50 లక్షలు రుణం తీసుకున్నాడు.

బంగారం గుర్తింపు, తాకట్టు వివరాల ఆధారంగా పోలీసులు విచారణ చేపట్టారు. ఆగస్టు 9 ఉదయం తిరుమలాయపాలెం రోడ్డు వెంబడి విచారణ సాగిస్తుండగా ప్రశాంత్‌, మహేష్‌లను అరెస్ట్‌ చేశారు. ప్రశాంత్‌ను ప్రధాన నిందితుడిగా, మహేష్‌ను దొంగిలించిన బంగారం పారవేయడంలో సహకరించిన నిందితుడిగా పోలీసులు పరిగణిస్తున్నారు.

నిందితుల ఆర్థిక పరిస్థితులు, ఆన్‌లైన్‌ బెట్టింగ్‌ కార్యకలాపాలు, హత్య సంబంధిత వివరాలపై పోలీసులు విచారణ కొనసాగిస్తున్నారు.