డైలీ భారత్, న్యూఢిల్లీ: వక్ఫ్‌ (సవరణ) బిల్లు-2025కు రాష్ట్రపతి ద్రౌపది ముర్ము సమ్మతిని తెలియజేశారు. లోక్‌సభ, రాజ్యసభలలో సుదీర్ఘ చర్చల తర్వాత ఈ బిల్లును ఉభయసభలు వేర్వేరుగా ఆమోదం తెలిపినస సంగతి తెలిసిందే. దీంతో ఈ బిల్లు రాష్ట్రపతి ద్రౌపది ముర్ము వద్దకు చేరుకుంది. దీంతో వక్ఫ్ (సవరణ) బిల్లు, 2025కు రాష్ట్రపతి ద్రౌపది ముర్ము శనివారం రోజున ఆమోద ముద్ర వేశారు.

వక్ఫ్‌ (సవరణ) బిల్లు-2025కు రాష్ట్రపతి ద్రౌపది ముర్ము సమ్మతిని తెలియజేశారు. లోక్‌సభ, రాజ్యసభలలో సుదీర్ఘ చర్చల తర్వాత ఈ బిల్లును ఉభయసభలు వేర్వేరుగా ఆమోదం తెలిపినస సంగతి తెలిసిందే. దీంతో ఈ బిల్లు రాష్ట్రపతి ద్రౌపది ముర్ము వద్దకు చేరుకుంది. దీంతో వక్ఫ్ (సవరణ) బిల్లు, 2025కు రాష్ట్రపతి ద్రౌపది ముర్ము శనివారం రోజున ఆమోద ముద్ర వేశారు. రాష్ట్రపతి సమ్మతి పొందడటంతో ఈ బిల్లు ఇప్పుడు చట్టంగా మారింది. కేంద్ర ప్రభుత్వం అధికారిక గెజిట్‌లో నోటిఫికేషన్ జారీ చేసిన తేదీన ఈ కొత్త వక్ఫ్ చట్టం అమల్లోకి రానుంది. ఇక, ముస్సల్మాన్ వక్ఫ్ (రద్దు) బిల్లు, 2025కు కూడా రాష్ట్రపతి తన ఆమోదం తెలిపారు. ఈ బిల్లను కూడా పార్లమెంట్ ఆమోదించిన సంగతి తెలిసిందే.

ఈ కొత్త వక్ఫ్ చట్టం... భారతదేశంలో వక్ఫ్ ఆస్తుల నిర్వహణ, పరిపాలనను మెరుగుపరచడానికి ప్రయత్నిస్తుంది. అలాగే వక్ఫ్ చట్టం, 1995ను సవరించే ప్రయత్నం. ఇది వక్ఫ్ కౌన్సిల్, బోర్డుల కూర్పు, వక్ఫ్ ఆస్తులను స్థాపించడానికి ప్రమాణాలు, వక్ఫ్ ఆస్తులను గుర్తించడంలో బోర్డు అధికారంలో మార్పులను ప్రతిపాదించింది. వక్ఫ్‌ (సవరణ) బిల్లును తొలుత గతేడాది ఆగస్టులో పార్లమెంటులో ప్రవేశపెట్టారు. అయితే విపక్షాల నుంచి, ముస్లిం సంస్థల నుంచి తీవ్ర నిరసనలు వ్యక్తమయ్యాయి. ఈ క్రమంలోనే ఈ బిల్లును బీజేపీ ఎంపీ జగదాంబికా పాల్ నేతృత్వంలోని జాయింట్ పార్లమెంటరీ కమిటీ (జేపీసీ)కి పంపారు.

ఈ బిల్లుపై నెలల తరబడి చర్చించిన తర్వాత ఈ ఏడాది ఫిబ్రవరి 13న జేపీసీ తన నివేదికను సమర్పించింది. దీనిని కేంద్ర మంత్రివర్గం ఫిబ్రవరి 19న ఆమోదించింది. అయితే జేపీసీలోని ప్రతిపక్ష ఎంపీలు... తమ ప్రతిపాదిత సవరణలను తిరస్కరించారని, తమకు తెలియకుండానే తమ అసమ్మతి గమనికలను తొలగించారని ఆందోళన వ్యక్తం చేశారు. ఇక, ప్రతిపక్ష ఎంపీలు ప్రతిపాదించిన 44 సవరణలను జేపీసీ తిరస్కరించగా... ఎన్డీఏ సభ్యులు సూచించిన 14 మార్పులను ఆమోదించింది.

ఇక, ఎట్టకేలకు వక్ఫ్ (సవరణ) బిల్లు, 2025 కేంద్రం బుధవారం రోజున లోక్‌సభలో ప్రవేశపెట్టింది.. అక్కడ దాదాపు 12 గంటల పాటు వాడీవేడీ చర్చ తర్వాత గురువారం తెల్లవారుజామున ఓటింగ్ నిర్వహించారు. ఈ బిల్లను లోక్‌సభ 288–232 ఓట్లతో ఆమోదించింది. వక్ఫ్ (సవరణ) బిల్లు గురువారం మధ్యాహ్నం రాజ్యసభ ముందుకు వచ్చింది. కేంద్ర మంత్రి కిరెన్ రిజిజు రాజ్యసభలో ఈ బిల్లును ప్రవేశపెట్టి చర్చను ప్రారంభించారు. రాజ్యసభలో కూడా ఈ బిల్లుపై సుదీర్ఘ చర్చ సాగింది. శుక్రవారం తెల్లవారుజామున ఈ బిల్లుపై ఓటింగ్ నిర్వహించగా... మొత్తం మీద బిల్లుకు అనుకూలంగా 128 ఓట్లు, బిల్లుకు వ్యతిరేకంగా 95 ఓట్లు వచ్చాయి. దీంతో వక్ఫ్ (సవరణ) బిల్లుకు పార్లమెంట్ ఉభయసభలు ఆమోదం తెలిపినట్టు అయింది. ఇదిలా ఉంటే, వక్ఫ్‌ బిల్లు చెల్లుబాటును సవాలు చేస్తూ కాంగ్రెస్‌ ఎంపీ మహమ్మద్‌ జావెద్, ఎంఐఎం అధినేత అసదుద్దీన్‌ ఒవైసీ సుప్రీంకోర్టును ఆశ్రయించారు.