కామారెడ్డిలో సినిమా స్టైల్ కిడ్నాప్...
హార్వెస్టర్ లీజు పేరుతో పిలిచి రూ.10 లక్షలు డిమాండ్...
నిద్రపోయిన కిడ్నాపర్ల నుంచి తప్పించుకున్న బాధితుడు!
డైలీ భారత్, కామారెడ్డి: హార్వెస్టర్ మిషన్లు లీజుకు ఇస్తామని నమ్మించి వ్యక్తిని కిడ్నాప్ చేసి రూ.10 లక్షలు డిమాండ్ చేసిన సంచలన కేసులో దోమకొండ పోలీసులు నలుగురు నిందితులను పట్టుకున్నారు. కేసు వివరాలను జిల్లా ఎస్పీ యం. రాజేష్ చంద్ర, ఐపీఎస్ వెల్లడించారు.
బాధితుడు ఎవరు?
కోనాపూర్ గ్రామానికి చెందిన చిందం మహేష్ (32) వరి కోత హార్వెస్టర్ మిషన్లను లీజుకు తీసుకొని నడుపుకుంటూ జీవనోపాధి పొందుతున్నాడు.
జైలులో పరిచయంతో నేరాలకు పథకం:
నిందితులు నిట్టూ నరసింగరావు, ఎరుగు నగేష్, చిందం శ్రీకాంత్ గతంలో జైలులో ఉన్న సమయంలో ఒకరికొకరు పరిచయమయ్యారు. జైలు నుంచి విడుదలైన అనంతరం సులభంగా డబ్బులు సంపాదించాలనే ఉద్దేశంతో డబ్బున్న వ్యక్తిని కిడ్నాప్ చేసి డబ్బులు వసూలు చేయాలని పథకం వేశారు.
చిందం శ్రీకాంత్‌కు పరిచయమున్న కోనాపూర్‌కు చెందిన మహేష్ దగ్గర డబ్బు ఉందని, పిరికివాడని గుర్తించి అతనినే లక్ష్యంగా ఎంచుకున్నారు.
నెల రోజులు నకిలీ పేరుతో ఫోన్‌లో మాటలు:
నిట్టూ నరసింగరావు కరుణాకర్ రెడ్డి అనే నకిలీ పేరుతో, దొరికిన సిమ్ కార్డు ఉపయోగించి సుమారు నెల రోజుల పాటు మహేష్‌తో మాట్లాడి హార్వెస్టర్ మిషన్లు అద్దెకు ఇస్తామని నమ్మించాడు. ముందుగానే బాధితుడి ఇంటి పరిసరాలు, రాకపోకల మార్గాలను పరిశీలించి తెల్లరంగు మారుతి ఎర్టిగా కారును అద్దెకు తీసుకున్నారు.
22-10-2026న కిడ్నాప్ - దాడి, దోపిడి:
తేదీ 22-10-2026న నిందితులు కారులో కోనాపూర్ గ్రామానికి చేరుకొని, హార్వెస్టర్ మిషన్లు చూపిస్తామని చెప్పి మహేష్‌ను కారులో ఎక్కించుకొని కిడ్నాప్ చేశారు. కొంతదూరం వెళ్లిన తర్వాత అతడి ముఖానికి ఉన్ని టోపీని మాస్క్‌లా వేసి ఏమీ కనపడకుండా చేసి, కాళ్లతో తన్నుతూ, చేతులతో కొడుతూ రూ.10 లక్షలు ఇవ్వాలని, లేదంటే చంపేస్తామని బెదిరించారు. అనంతరం బాధితుడి వద్ద ఉన్న POCO M6 5G సెల్‌ఫోన్, పర్సులోని రూ.2,500 నగదును బలవంతంగా లాక్కున్నారు.
మద్యం సేవించి నిద్రపోయిన నిందితులు - తప్పించుకున్న బాధితుడు:
నిందితులు మద్యం సేవించి, ఇందల్వాయి ఒక దాబా హోటల్ వద్ద కారు నిలిపి నిద్రలోకి జారుకున్న సమయంలో బాధితుడు వారి చెర నుంచి తప్పించుకొని ఇందల్వాయి బస్‌స్టాండ్‌కు చేరుకున్నాడు. అక్కడి నుండి దోమకొండకు వచ్చి పోలీస్ స్టేషన్‌లో ఫిర్యాదు చేశాడు.
ఈ ఘటన అనంతరం నిందితులు తమ నేరాన్ని కప్పిపుచ్చుకునేందుకు గ్రామ సర్పంచ్, ఉపసర్పంచ్‌లకు ఫోన్ చేసి తాము బీహార్‌కు చెందిన వారమని, బాధితుడు తమ మహిళలతో అసభ్యంగా ప్రవర్తించినందున అతడిని తీసుకెళ్లి బెదిరించి వదిలిపెట్టామని తప్పుడు సమాచారం ఇచ్చి పోలీసులను తప్పుదోవ పట్టించే ప్రయత్నం చేశారు.
రెండోసారి కిడ్నాప్‌కు వచ్చి దొరికిపోయారు:
బాధితుడు మొదటిసారి కిడ్నాప్ సమయంలో భయంతో "నాకు ఆడపిల్లలు ఉన్నారు, నన్ను వదిలేయండి, ఎంతైనా డబ్బులు ఇస్తాను" అని చెప్పినందున, అతడిని మరోసారి కిడ్నాప్ చేసి డబ్బులు వసూలు చేయాలని నిందితులు మరోసారి పథకం వేశారు. ఇందులో భాగంగా 09-11-2026న తిరిగి అదే కారును అద్దెకు తీసుకొని కోనాపూర్ గ్రామ శివారులోని ఎల్లమ్మ గుడి వద్ద ఉండగా పోలీసులు కారును అనుమానించి వారిని అదుపులోకి తీసుకున్నారు. విచారణలో కిడ్నాప్, దోపిడి బయటపడింది.
పోలీసుల దర్యాప్తు:
జిల్లా ఎస్పీ ఆదేశాల మేరకు కామారెడ్డి డీఎస్పీ శ్రీ మధుసూదన్ పర్యవేక్షణలో భిక్నూర్ సర్కిల్ ఇన్‌స్పెక్టర్ శ్రీ నరేష్, దోమకొండ ఎస్ఐ శ్రీ ప్రభాకర్ మరియు సిబ్బందితో రెండు ప్రత్యేక బృందాలను ఏర్పాటు చేశారు. బాధితుడు ఇచ్చిన సమాచారం, సీసీటీవీ కెమెరాల పరిశీలన, సాంకేతిక ఆధారాల సహాయంతో నిందితులను గుర్తించి పట్టుకున్నారు.
నిందితుల పూర్తి వివరాలు:
A-1: నిట్టూ నరసింగరావు, తండ్రి: నాగేంద్రహార్ రావ్, చిట్యాల గ్రామం, తాడ్వాయి - (3 కేసులు: భూ వివాదం, హత్యాయత్నం & పేలుడు పదార్థాల కేసు, కిడ్నాప్ & ఆయుధాల చట్టం కేసు)
A-2: ఎరుగు నగేష్ @ నాయేష్, తండ్రి: మహేందర్, గన్నారం గ్రామం, ఇందల్వాయి, నిజామాబాద్ జిల్లా - (తన 9 నెలల గర్భవతి అయిన భార్యను హత్య చేసిన కేసు కలదు)
A-3: తెడ్డూ సురేష్, తండ్రి: బాబయ్య, గన్నారం గ్రామం, ఇందల్వాయి - (మొదటి నేరం)
A-4: చిందం శ్రీకాంత్, తండ్రి: మల్లయ్య, కోనాపూర్ గ్రామం, బీబీపేట మండలం - (దోమకొండ PS పరిధిలో దొంగతనం కేసు కలదు)
స్వాధీనం చేసుకున్న వస్తువులు:
1. తెల్లరంగు Ertiga కార్ (TS 16 EF 8889)
2. బాధితుడి సెల్‌ఫోన్ + నిందితుల 4 మొబైల్ ఫోన్లు
3. బాధితుడి ముఖానికి మాస్క్‌లా ఉపయోగించిన ఉన్ని టోపీ
4. ఒక ద్విచక్ర వాహనం
ఈ కేసును ఛేదించడంలో చురుకుగా పనిచేసిన భిక్నూర్ సర్కిల్ ఇన్‌స్పెక్టర్ శ్రీ నరేష్, దోమకొండ ఎస్ఐ శ్రీ ప్రభాకర్ మరియు కానిస్టేబుల్ సాయిబాబా, బాలకృష్ణ, బైరవప్రసాద్, హోం గార్డ్ శ్రీకాంత్‌లను జిల్లా ఎస్పీ అభినందించారు.
#DailyBharath #Kamareddy #DomakondaPolice #KidnapCase #Harvester
