అంగలకుదురు-యడ్లపల్లి రోడ్డుపై ట్రాఫిక్ స్తంభన
డైలీ భారత్, తెనాలి: గుంటూరు జిల్లా తెనాలి మండలం చావారిపాలెం వద్ద శుక్రవారం ఉదయం విద్యార్థులు, ఉపాధ్యాయుల నిరసనతో ఉద్రిక్తత నెలకొంది. శిథిలమైన రోడ్డు కారణంగా పడుతున్న ఇబ్బందులకు నిరసనగా "అంగలకుదురు-యడ్లపల్లి" ప్రధాన రహదారిపై వారు బైఠాయించారు.
గుంతలతో ప్రమాదాలకు నిలయంగా రోడ్డు...
ఈ రహదారి చాలా కాలంగా నిర్వహణ లేక గుంతలమయంగా మారింది. ప్రతిరోజూ స్కూళ్లు, కళాశాలలకు వెళ్లే వందలాది మంది విద్యార్థులు, ఉపాధ్యాయులు ఈ దారిలో ప్రయాణించాల్సి వస్తోంది. వర్షాలు పడినప్పుడు గుంతల్లో నీరు నిలిచి రాకపోకలకు తీవ్ర అంతరాయం ఏర్పడుతోంది. ఇప్పటికే చాలా మంది విద్యార్థులు ద్విచక్ర వాహనాలపై నుండి పడి చిన్నచిన్న ప్రమాదాలకు గురయ్యామని నిరసనకారులు ఆవేదన వ్యక్తం చేశారు.
ప్లకార్డులు పట్టి నినాదాలు...
అధికారుల నిర్లక్ష్యంపై ఆగ్రహం వ్యక్తం చేసిన విద్యార్థులు, టీచర్లు "రోడ్డు నిర్మించండి-మా ప్రాణాలు కాపాడండి", "ప్రమాదాలు జరగకముందే అధికారులు స్పందించాలి" అంటూ ప్లకార్డులు చేతబూని రోడ్డుపైనే బైఠాయించారు. R&B శాఖ అధికారుల తీరును తప్పుబట్టారు.
కిలోమీటర్ల మేర ట్రాఫిక్ జామ్...
విద్యార్థుల ఆకస్మిక ధర్నా కారణంగా అంగలకుదురు-యడ్లపల్లి మార్గంలో గంటకు పైగా వాహనాల రాకపోకలు స్తంభించాయి. దీంతో ప్రయాణికులు తీవ్ర ఇబ్బందులు పడ్డారు.
ఉన్నతాధికారులకు నివేదిస్తామని హామీ...
సమాచారం అందుకున్న స్థానిక పోలీసులు, ప్రజాప్రతినిధులు ఘటనా స్థలానికి చేరుకుని విద్యార్థులతో మాట్లాడారు. సమస్యను ఉన్నతాధికారుల దృష్టికి తీసుకెళ్తామని హామీ ఇవ్వడంతో ఆందోళన తాత్కాలికంగా విరమించారు.
తక్షణమే రోడ్డు మరమ్మతులు చేపట్టకపోతే, శాశ్వతంగా కొత్త రోడ్డు నిర్మించకపోతే రాబోయే రోజుల్లో ఆందోళనలను మరింత ఉధృతం చేస్తామని విద్యార్థులు, ఉపాధ్యాయులు, గ్రామస్థులు హెచ్చరించారు.
#TenaliNews #Guntur #StudentsProtest #BadRoads #RB #AndhraPradesh
