డైలీ భారత్, రాజన్న సిరిసిల్ల: వేములవాడ పట్టణంలోని పలు ప్రైవేట్ ఆసుపత్రులు, డయాగ్నస్టిక్ స్కానింగ్ సెంటర్లను జిల్లా వైద్య & ఆరోగ్యశాఖ అధికారి డా. ఏంజెలా ఆల్ఫ్రెడ్ ఆకస్మికంగా తనిఖీ చేశారు.

ఈ సందర్భంగా ఆసుపత్రుల్లో అందించే సేవలకు సంబంధించిన రుసుముల పట్టికను ప్రజలకు కనిపించేలా ప్రదర్శించాలని, ఆసుపత్రి పరిసరాలను పరిశుభ్రంగా ఉంచాలని సూచించారు. బయోమెడికల్ వ్యర్థాల నిర్వహణ సర్టిఫికేట్, పొల్యూషన్ సర్టిఫికేట్, ఫైర్ సేఫ్టీ పరికరాలు, వైద్యులు మరియు సిబ్బంది వివరాలను తప్పనిసరిగా ప్రదర్శించాలని ఆదేశించారు.

స్కానింగ్ సెంటర్లలో గర్భిణులకు సేవలు అందించే సమయంలో PCPNDT చట్టం నిబంధనలను కచ్చితంగా పాటించాలని, లింగ నిర్ధారణ పరీక్షలు నిర్వహించడం పూర్తిగా చట్టవిరుద్ధమని హెచ్చరించారు. అనుమతి పొందిన రేడియాలజిస్టులు లేదా గైనకాలజిస్టులే స్కానింగ్ నిర్వహించాలని, "ఇక్కడ లింగ నిర్ధారణ చెప్పబడదు" అనే బోర్డును స్కానింగ్ గది, వేచియుండు హాలులో తప్పనిసరిగా ఏర్పాటు చేయాలని సూచించారు.

ఫారం-ఎఫ్‌ను అదే రోజు ఆన్‌లైన్‌లో నమోదు చేయాలని, ప్రతి నెల 5వ తేదీలోపు సంబంధిత పత్రాలను జిల్లా వైద్య & ఆరోగ్యశాఖ కార్యాలయానికి సమర్పించాలని ఆదేశించారు.

తనిఖీలలో అనుమతులు లేకుండా నిర్వహిస్తున్న రెండు డయాగ్నస్టిక్ సెంటర్లను గుర్తించి, వాటి యాజమాన్యాలకు నోటీసులు జారీ చేశారు.

ఈ తనిఖీలలో సెక్షన్ ఇన్‌చార్జి మహేష్ తదితరులు పాల్గొన్నారు.

#RajannaSircilla #Vemulawada #DMHO #DrAngelaAlfred #HealthDepartment #PrivateHospitals #DiagnosticCenters #PCPNDTAct #MedicalInspection #TelanganaNews