డైలీ భారత్, భోపాల్: మధ్యప్రదేశ్ రాజధాని భోపాల్‌లో ఓ వింత ఘటన చోటు చేసుకుంది. పంచాయతీ గ్రామీణాభివృద్ధి, కార్మిక శాఖ మంత్రి ప్రహ్లాద్‌ సింగ్‌ పటేల్‌ బంగ్లాలోని వేప చెట్టుకు మామిడి పండ్లు వేలాడుతూ కనిపించాయి.

స్వయంగా మంత్రి కూడా ఈ విషయాన్ని చూసి ఆశ్చర్యపోతూ సోషల్ మీడియాలో వీడియో షేర్ చేశారు. ఇక, నెట్టింట వైరల్‌గా మారిన ఈ వీడియోను చూసి అందరూ షాక్ అవుతున్నారు. నైపుణ్యం కలిగిన తోటమాలి ఈ ప్రయోగాన్ని సంవత్సరాల క్రితం చేసి  ఉంటారని కొంతమంది, మంత్రి ప్రహ్లాద్ సింగ్ పటేల్ పేర్కొన్నారు.

వేప చెట్టు సుమారు 20 నుంచి 25 సంవత్సరాల వయస్సు గలదని.. ఈ సంవత్సరం ముఖ్యమంత్రి నివాసం తర్వాత ఈ బంగ్లాను ప్రహ్లాద్ పటేల్ పొందారు. B-7 బంగ్లా భోపాల్‌లోని ప్రొఫెసర్ కాలనీకి సమీపంలో ఉన్న సివిల్ లైన్స్‌లో ఉంది. ఆయన బంగ్లా చుట్టూ పెద్ద సంఖ్యలో చెట్లు, మొక్కలు నాటారు. అందులో ఒక వేప చెట్టు కూడా ఉంది. వాస్తవానికి, ఈ బంగ్లాలో ప్రస్తుతం నిర్మాణ పనులు జరుగుతున్నాయి. దీనిని పరిశీలించడానికి మంత్రి ప్రహ్లాద్ సింగ్ పటేల్ శనివారం ఇక్కడకు చేరుకున్నారు. ఈ సమయంలో, మామిడి పండ్లు వేలాడుతున్న వేప చెట్టుపై అతని కళ్ళు పడ్డాయి. నిజానికి, వేప చెట్టుపై మామిడి కొమ్మ కూడా ఉంది.. ఇది చూసి అతను కూడా ఒక్కసారిగా ఆశ్చర్యపోయి.. వెంటనే వ్యవసాయ శాస్త్రవేత్తలకు సమాచారం అందించారు. ఈ వేప చెట్టుకు పరిశీలించిన వృక్షశాస్త్రజ్ఞుడు ప్రతిభా సింగ్ మాట్లాడుతూ.. ఈ చెట్టులో మామిడి చెట్టు పెరిగే అవకాశం ఉంది.. చాలా సార్లు, మామిడి గింజలు పెద్ద చెట్ల నుండి పడిపోయినప్పుడు.. మొక్కలుగా పెరుగుతాయని చెప్పారు.